МАЛ БИТОЛСКИ МОНМАРТР Десетта детска ликовна работилница Фестивалот “Мал битолски Монмартр”, една од нај­популарните детски ликовни манифестации кај нас, прославува десетти јубилеј. По тој повод, беа одржани повеќе мани­фестации, активности, гостувања... Во Скопје се во тек две изложби на фестивалот, како придонес на децата-умет­ници за прославата на 60-годишнината од ослободувањето на главниот град на Македонија. Поставени се во Културно-информативниот центар во Скопје и ќе бидат отворени за посетителите до 11 декември 2004 година. Првата изложба ги опфаќа делата создадени на 10-тата јубилејна летна ликовна работилница, и е насловена како “Бисери на малиот битол­ски Монмартр”, а втората, под наслов “Пелистерска рапсодија” прет­ставу­ва дела кои беа создадени во рамките на исто­имената работилница организирана во рамките на годинешниов фестивал. Годинава, својот јубилеј Малиот битолски монмартр го одбележи и со две значајни гостувања – му припадна честа да го отвори меѓународниот уметнички фестивал “Монмартр на Европа” што се одржа во мај и јуни во Париз, Франција, на кој учествуваа деца од околу 30 европски држави. На овој фестивал беа изложени 60 детски цртежи од Македонија, во чест на 60-годишниот јубилеј од АСНОМ (Антифашистичкото собрание на народното ослободување на Македонија). Потоа, по пока­на од Меѓународниот олимписки комитет, Малиот битолски Монмартр учествуваше на Олим­пијадата во Атина, на изложбата на ли­ковни дела од налов “Олимпијадата во очите на младите”. М.И.