По повод Денот на државноста

Традиционално искачување на Голем Кораб

Во организација на Планинарското спортско друштво “Кораб” од Скопје, на 04.09.2005 г. се одржа традиционалното ме­ѓународно искачување на највисокиот пла­нински врв во Македонија, Голем Кораб (2.754 мнв), на планината Кораб. 14-та година по ред планинарите од нашата др­жава на овој начин го одбележуваат 8 Септември, Денот на државноста на Репу­бли­ка Македонија. Во последниве 2-3 го­ди­ни сe поголем е интересот на планинарите од соседните држави, но и од земји од светот, за учество во оваа акција, и од тие причини искачувањето се одржа викендот пред 8 сеп­тември.

Оваа година во искачувањето учествуваа повеќе од 1.000 планинари, меѓу кои над 100 од 17 земји од светот. За прв­пат имаше учесници од Укра­и­на, од Узбекистан и од Јуж­на Кореја, а веќе вообичаено е присуството на планинари од Србија и Црна Гора, од Босна и Херцеговина, од Хр­ват­ска, од Бугарија, од Сло­вачка, од Полска и од Русија. Учествуваа и планинарски­те друштва од Македонија. Број­ката од 65 активни друш­тва укажува на фактот дека планинарството е еден од најмасовните спортови во нашата држава. Сите тие се организирани како здруженија на граѓани чија цел се унапредувањето и развојот на планинарството кај нас, ширењето на љубовта кон планините и кон природата, поттикнување на развојот на еколошката свест, а како спортска цел е, секако, освојувањето на што поголем број високи планински врвови, не само во Македонија, туку и во странство.

Планинарското спортско друштво “Кораб” од Скопје, освен како организатор на акцијата за искачување на врвот Голем Кораб, е едно од најактивните и најбројните планинарски друштва кај нас. Постои од 1997 година, има повеќе од 200 активни членови и во текот на годината организира околу 50 акции. Искачувањето на врвот Голем Кораб и оваа година помина во најдобар можен ред, без инциденти или несреќни случаи. На секогаш непредвидли­ви­от Кораб, временските услови беа идеални за искачување. Од причини што врвот се наоѓа во гранична зона, организаторот доби голема помош и соработка од Граничната бригада на МВР.

                                                            
Т. Д.