Претседателот Борис Трајковски за граѓанскиот сектор
Барам од вас да го ширите духот на доброволната работа
„Духот на волонтеризмот е слаб во Македонија. Додека многу граѓани навистина посветуваат голем дел од своето време и средства за оваа цел, многу други не го прават тоа, често затоа што не ја разбираат улогата која невладините организации ја играат, или пак не можат да ги видат резултатите, како материјални така и духовни, кои можат да се добијат преку доброволната работа. Затоа, барам од вас да го ширите духот на доброволната работа каде и да одите и со кого и да се среќавате. Поттикнете ги граѓаните на Македонија да се ангажираат и да се посветат на тоа“.
(НВО Саем, октомври 2001 г.)
„Според сите позначајни општествени теории, еден од столбовите на демократијата во нејзиното модерно разбирање е развојот на невладиниот сектор. Ова е особено важно за земјите во транзиција. Иницирањето и јакнењето на невладините организации е темел на формирање силно граѓанско општество.“
(НВО Саем - 2 форум на граѓанското општество во Македонија, октомври 2002 г.)
„Во процесот на градење натпартиски или меѓуетнички консензус, државата и политичките субјекти немаат доволно потенцијали, сами, без поддршка од невладините организации да го направат нужниот општествен договор доволно силен и отпорен. Мојата политичка филозофија денес немаше да биде целосна, доколку не работев во граѓанскиот сектор се до 1997 година.“
(НВО Саем - 3 форум на граѓанското општество во Македонија, ноември 2003 г.)
„Со МЦМС ме поврзуваат повеќе искуства, почнувајќи од првата Меѓуверска конференција во 1996 година, како коорганизатори, преку хуманитарната координација за време на Косовската криза во 1999 година, кога јас ја вршев функцијата заменик-министер за надворешни работи и понатамошната комуникација како претседател на државата во нашата криза во 2001 година, како и комуникацијата за надминување на блокадите на хуманитарната помош за кризните подрачја, и трите последователни години од 2001 до оваа година, околу НВО Саемот - форум на граѓанското општество во Македонија“.
(По повод јубилејот - 10 години од основањето на МЦМС, декември 2003 год.)
|